بلوچستان کے پسماندہ علاقوں میں دین کی روشنی، مولانا ذوالفقار علی سعیدی کی تبلیغی خدمات

حوزہ نیوز ایجنسی کی رپورٹ کے مطابق، بلوچستان کا خطہ اپنی جغرافیائی وسعت، دشوار گزار راستوں اور بنیادی سہولیات کی کمی کے باعث ہمیشہ سے مشکلات کی علامت رہا ہے۔ یہاں کے دور دراز دیہات اور پہاڑی علاقوں تک پہنچنا کسی آزمائش سے کم نہیں، مگر اس کے باوجود کچھ افراد ایسے بھی ہوتے ہیں جو دین و علم کی شمع روشن رکھنے کے لیے ہر سختی کو قبول کرتے ہیں۔ انہی افراد میں مجلس علماء مکتبِ اہلبیت بلوچستان کے صوبائی صدر مولانا ذوالفقار علی سعیدی بھی ہیں، جو سخت حالات کے باوجود گاؤں گاؤں جا کر دینی تبلیغ اور تعلیم کے فروغ میں مصروف عمل ہیں۔

حال ہی میں مولانا ذوالفقار علی سعیدی نے ضلع بولان کے مختلف علاقوں بھاگ، چھلگری، بختیار آباد اور دیگر دور افتادہ مقامات میں قائم دینی تعلیم کے مراکز کا طویل اور مشقت بھرا دورہ کیا۔ ان علاقوں تک پہنچنے کے لیے طویل سفر، خراب سڑکیں اور بنیادی سہولیات کی کمی ایک بڑا چیلنج ہیں، مگر اس کے باوجود انہوں نے بچوں اور نوجوانوں تک علم و معرفت پہنچانے کے لیے ان مقامات کا رخ کیا۔

طلبہ و طالبات سے امتحان اور تعلیمی جائزہ

دورے کے دوران مولانا ذوالفقار علی سعیدی نے دینی مراکز میں زیرِ تعلیم طلبہ و طالبات سے امتحان لیا اور ان کی تعلیمی کارکردگی کا جائزہ لیا۔ انہوں نے بچوں کی علمی استعداد کو سراہتے ہوئے اساتذہ کی محنت کو قابلِ تحسین قرار دیا اور مزید بہتری کے لیے رہنمائی بھی کی۔

معلمین سے ملاقات اور تربیتی ہدایات

مولانا ذوالفقار علی سعیدی نے مراکز کے معلمینِ کرام سے بھی ملاقات کی اور دینی تعلیم کے فروغ میں ان کی خدمات کو سراہا۔ انہوں نے اساتذہ پر زور دیا کہ وہ بچوں کی دینی و اخلاقی تربیت پر خصوصی توجہ دیں تاکہ ایک باشعور، بااخلاق اور باکردار نسل تیار ہو سکے جو معاشرے کی رہنمائی کر سکے۔

حوزہ نیوز سے خصوصی گفتگو

اس موقع پر حوزہ نیوز کے خبرنگار سے خصوصی گفتگو کرتے ہوئے مولانا ذوالفقار علی سعیدی نے بتایا: “بلوچستان کے دور دراز علاقوں میں دینی تعلیم کی شدید ضرورت ہے۔ یہاں کے بچے بہت باصلاحیت ہیں، مگر سہولیات نہ ہونے کے باعث ان کی صلاحیتیں ضائع ہو رہی ہیں۔ ہماری کوشش ہے کہ ان بچوں تک علمِ اہل بیتؑ کے معارف پہنچائیں تاکہ وہ دینی شعور کے ساتھ آگے بڑھیں۔”

انہوں نے مزید کہا کہ ان علاقوں میں سفر کرنا آسان نہیں، لیکن بچوں کے چہروں پر علم کی روشنی دیکھ کر تمام مشکلات آسان ہو جاتی ہیں۔

معارفِ اہل بیتؑ کے فروغ کی جدوجہد

مولانا ذوالفقار علی سعیدی نے بتایا کہ دینی مراکز میں قرآن، فقہ، اخلاق اور سیرتِ اہل بیتؑ کی تعلیم پر خصوصی توجہ دی جا رہی ہے۔ ان کا کہنا تھا کہ اہل بیتؑ کے معارف انسان کو عدل، انصاف اور انسانیت کا درس دیتے ہیں اور یہی تعلیمات معاشرے کی اصلاح کی بنیاد ہیں۔

انہوں نے کہا کہ بچوں میں عقائد کی مضبوطی اور اخلاقی تربیت کے لیے مسلسل تبلیغی نشستیں، دروس اور تربیتی پروگرام منعقد کیے جا رہے ہیں تاکہ وہ دین کو محض کتابی علم کے طور پر نہیں بلکہ عملی زندگی کا حصہ بنائیں۔

طلبہ سے گفتگو

مولانا ذوالفقار علی سعیدی نے طلبہ سے گفتگو کرتے ہوئے کہا کہ علم خصوصاً دینی علم انسان کی دنیا و آخرت کی کامیابی کا ذریعہ ہے۔ انہوں نے بچوں کو محنت، لگن اور اخلاص کے ساتھ تعلیم حاصل کرنے کی تلقین کی اور کہا کہ دینی مراکز ہمارے معاشرے کی بنیاد ہیں، جن کی مضبوطی ہم سب کی مشترکہ ذمہ داری ہے۔

قابل ذکر ہے کہ بلوچستان کے دشوار گزار علاقوں میں مولانا ذوالفقار علی سعیدی جیسے علماء کی جدوجہد اس بات کا ثبوت ہے کہ دین و علم کی خدمت کسی ایک شہر یا سہولت کا محتاج نہیں۔ یہ وہ خاموش مجاہد ہیں جو مشکلات کے باوجود نسلِ نو کو علم، اخلاق اور معرفتِ اہل بیتؑ سے آشنا کر رہے ہیں، تاکہ آنے والی نسل ایک روشن، باشعور اور باکردار معاشرہ تشکیل دے سکے۔